Exposición

A intención comunicativa da exposición é a de transmitir unha información, aclarar, explicar. Este tipo de texto está moi presente no ámbito académico e tamén no ámbito xornalístico. É neste último ámbito no que nos centraremos.

Os principais textos expositivos de tipo xornalístico son: a noticia, a entrevista, a crónica e a reportaxe.

A noticia é un texto breve que recolle, de maneira obxectiva, un feito de actualidade.

Toda noticia ha de respostar a estas cuestións: QUE? QUEN? ONDE? CANDO? COMO? POR QUE? PARA QUE?

As partes da noticia son:

- ANTETÍTULO

- TITULAR

- SUBTÍTULO

- ENTRADA

- CORPO

A linguaxe da noticia caracterízase pola súa concisión e claridade. Ha de ser tamén unha linguaxe respectuosa, pois vai dirixida a un público amplo e diverso.

4ºPDC: Comezamos!

1.- Pon un titular ás seguintes noticias. Lembra que o titular ten que informar, pero tamén resultar chamativo.

A) O mozo veciño de Mos (Pontevedra), que permanecía ingresado en Vigo desde o luns, e o home da Coruña, que levaba no hospital desde o xoves, recibiron a alta médica despois de que os resultados desen negativo á gripe AH1N1, mentres que a moza de Ourense seguirá no hospital ata que se coñezan os resultados definitivos das súas probas.
Segundo confirmou onte a propia Consellería de Sanidade, no caso do paciente ingresado no Complexo Hospitalario Universitario de Vigo (Chuvi), foi dado de alta tras dar negativa a análise relativa á gripe A polo sistema PCR no laboratorio de referencia de Galicia.
Ademais, foi dado de alta, tras ser descartado como caso en investigación, o paciente ingresado o xoves á noite no Complexo Hospitalario Universitario da Coruña logo de confirmarse que "non posúe afección vinculada con síntomas gripais AH1N1", aínda que fose necesario o seu ingreso, xa que cumpría co protocolo para o seu illamento.
Namentres, a paciente ingresada no Complexo Hospitalario de Ourense (CHOU) deberá continuar ingresada á espera de confirmación das análises por parte do Centro Nacional de Microbioloxía de Madrid, tendo en conta que as probas realizadas polo sistema PCR no laboratorio de referencia de Galicia "non descartan que poida estar afectada polo virus AH1N1". Sanidade, recalcou que o seu estado de saúde "é bo". Asemade, a consellería explicou que, coas actualizacións de protocolos realizadas na reunión das comunidades no Consello Interterritorial o venres en Madrid, o laboratorio de referencia de Galicia poderá descartar aqueles casos sospeitosos que non necesiten unha segunda análise no Centro Nacional de Microbioloxía. "Esta medida redunda na axilidade de resposta ante as eventualidades que poida presentar a evolución desta alerta", sinalou Sanidade.
A conselleira Pilar Farjas agradeceu "de xeito significativo" a "estreita" colaboración e o esforzo de todos os profesionais do sistema sanitario galego, así como do equipo técnico que traballa todos os días da semana no laboratorio de referencia de Galicia, e ó equipo de Saúde Pública, que actúa como coordinador das actuacións. (...)

B) O primeiro hospital integral galego de mascotas abrirá no parque empresarial de Pereiro de Aguiar en maio con salas de consulta para cans ou gatos, quirófanos e outras instalacións, e prevé que os propietarios que o desexen poidan permanecer en cuartos do centro xunto á súa mascota. Un dos socios e veterinario, Héctor Gómez Asenjo, explicou que un equipo de trinta especialistas e administrativos ofrece eses servizos veterinarios desde hai unha ducia de anos en Ourense para cans, gatos, paxaros e animais exóticos, pero observou que as instalacións "quedaron pequenas".
A decisión de ampliar o centro hospitalario para animais domésticos levouse a cabo tras visitar as experiencia doutros centros de España. (...)

O hospital pretende ademais ser un lugar de formación para alumnos da Facultade de veterinaria de Lugo, un laboratorio de referencia para a provincia. Os especialistas do centro e os veterinarios en período de prácticas disporán nesas instalacións de cuartos propios, unha biblioteca, comedor, cociña e ata un espazo de gardería para os seus fillos, segundo Gómez Asenjo.
Os seus promotores aspiran a darlles ós donos consellos para a alimentación e educación, demostracións farmacéuticas e congresos. O hospital tamén ofrecerá unha sala habilitada para necropsias para facilitar a despedida daquelas mascotas en fase terminal, e ata se expón a posibilidade de habilitar un cemiterio para mascotas. (...)

C) O representante especial da ONU para o proceso de paz en Oriente Próximo, Robert Serry, advertiu onte de que "a situación en Gaza é realmente alarmante" logo de visitar a zona costeira controlada por Hamás e constatar as dificultades que atravesan os seus 1,5 millóns de habitantes.
Serry lamentou que non existen progresos reais en Gaza desde que concluiu a ofensiva militar israelí, finalizada o pasado xaneiro. Durante a súa viaxe onte a Gaza, o representante da ONU foi informado das dificultades polas que atravesan familias, negocios e grupos civís, segundo un comunicado de Nacións Unidas. "A situación é realmente alarmante, xa que satisfacer as necesidades humanitarias e comezar a reconstrución é imposible sen a entrada de combustible, diñeiro e materiais necesarios para reparar as casas, escolas ou clínicas danadas ou destruídas", lamentou. Neste sentido, Serry incidiu en que mellorar o acceso é "crucial".
Así mesmo, Serry reclamou avances políticos, porque ó seu xuízo o risco de novos enfrontamentos violentos segue latente ata que non se resolvan asuntos como a reconciliación entre palestinos, a apertura dos pasos fronteirizos con Israel, a seguridade nas fronteiras ou o intercambio de prisioneiros. Por outra banda dous foguetes Qassam disparados por supostos milicianos palestinos desde a Franxa de Gaza caeron onte no sur de Israel.

2.- Selecciona unha noticia en Google noticias e identifica as súas partes.

3.- Redacta unha noticia dun tema local. Lembra que tes que dar resposta ás preguntas básicas e recoller todas as partes da súa estructura.